ALTHRI PUETI SASSARESI - Sassari.tv
FABIDEMMU IN SASSARESU
ALTHRI PUETI SASSARESI
Oggi dimmu dui parauri pa’ ammintà althri pueti sassaresi chi hani fattu cosi assai beddi, eddi puru ischribendi puisii di varori e fendisi cunniscì no soru in Sassari.
DI Mario Marras
 
 
 

Oggi dimmu dui parauri pa’ ammintà althri pueti sassaresi chi hani fattu cosi assai beddi, eddi puru ischribendi puisii di varori e fendisi cunniscì no soru in Sassari. La puisia nosthra ha ciambaddu peddi, pianu pianu, propiu pa’ l’obbara di tanti, chi hani cuntinuaddu i’ lu solchu di l’antigghi ma hani sabuddu dà un’impronta noba, più muderna, più vizina a li tempi chi ciambani, fabiddendi d’amori e di trabagliu, di la natura e di lu sintiddu, di la famiria d’oggi e di lu tempu chi passa, di la vecciaia e di la giubintura. Insomma, di tutti l’arghumenti chi po trattà una puisia, ma cun un’ucciadda tutta noba, dugnunu a modu soiu.

Vogliu ischuminzà cu’ una poetessa, Cinzia Cossu. Nadda i’ lu 1947, è una di li pogghi femmini chi hani ischrittu puisia (ammintemmuzi di Rosilde Bertolotti, famosa e assai cunniscidda in Sassari). Insignaba i’ la schora media e ha ischuminzaddu i’ lu 1995 a andà a li premi di puisia, undì ha fattu vidè tutta la so arthi e ha auddu gran suddifazioni. I’ lu 2005 è isciddu lu so’ libru “I’ l’intragni sigreti”, undì si poni liggì puisii pieni di sintimentu e d’amori pa’ la vidda, la famiria, li figliori, pa’ Sassari, la so’ ziddai. Lu 2005 è puru l’annu chi Cinzia si n’è andadda, pa’ cuipa d’una maraddia chi no pardhuneggia.

Si miresci attinzioni un gran vecciu (1922-2015), Palmiro De Giovanni. Lu babbu genobesu e la mamma sassaresa, era impiagaddu in un’impresa. Ha sempri auddu la passioni pa’ la schrittura e, dabboi giubilladdu, ha fattu tanti premi di puisia e no soru: i’ lu 1992 un romanzu soiu in sassaresu, “Climintina”, ha vintu lu Premiu Su casteddu de sa fae di Posada. Tanti puisii soi so isthaddi pubbricaddi da S’ischiglia, giornari famosu pa’ dà a tutti li sardhi chi ischribini la pussibiriddai di fassi liggì. Di siguru Palmiro De Giovanni ha purthaddu eddu puru un poggu di ventu freschu a la puisia di Sassari.

Mario Scanu (1934-1995) è un althru chi ha ischrittu beddi puisii chi pa’ zinc’anni abemmu liggiddu i’ La Nuova Sardegna, da lu 1975 a lu 1980, candu è finidda la pagina di la puisia sassaresa e no soru. Mario Scanu era cunnisciddu puru pa’ li gobbuli assai beddi e pisthiddenti.

Nino Fois e la muglieri M.Antonietta Noce so una coppia di gran pueti sassaresi: hani ischrittu assai e ca li cunnosci sa cantu so brabi, canta passioni hani posthu in chissi vessi chi l’hani daddu tanti suddifazioni. Oggi so dui vecciareddi un poggu isthracchi, ma sempri attenti a lu chi suzzedi in Sassari e a lu chi ischribini li pueti d’abà.

Beddi e pieni di sintiddu li puisii di Dino Siddi, morthu i’ lu 2000. Ommu di sport, cumenti althri fradeddi , Dino era appassiunaddu di puisia; tre so li libri chi z’ha lassaddu: ”Pusaddu i’ ra pidrissa”, “Pa’ rimunì un cuzzolu” e “Lu sonu di ri fiori”.

Ancora: Tino Grindi, chi ischribi in sassaresu e in italianu, abia già pubbricaddu “Sassari. Cionfra, amori e…” (1990), “I’ lu cori di Sassari”, “Semplicemente” (1995) e “Liberamente” (2002). E’ isthaddu, ed è, lu “paddronu” – si cussì si po dì - di “La cionfra” , chi iscia un be’ d’anni fa e piazia a tutti in Sassari, pa’ la buglia, li pigliaddi in giru e li buffunaturi chi prisintaba. Infatti Tino ha mantesu un beddu gusthu ischribendi gobbuli, unu di li pogghi chi ancora si probani cun chistu tipu di puisia tutta sassaresa.

Pa’ oggi zi po basthà; abremm’a ripiglia la chisthioni appena pussibiri.



 

 
 
 

© 2017 www.sassari.tv - Tutti i diritti riservati - Cookies Policy - Credits