Fabedda! La linga sassaresa di dumani - Sassari.tv
FABIDEMMU IN SASSARESU
Fabedda! La linga sassaresa di dumani
Lu sassaresu è sempri più prisenti a Sassari cu’ lu triatu, cantzoni, ecc. No ridesci parò a turrà a assé linga di comunicazioni cumpridda.
DI Fabritziu Dettori
 
 
 

Lu sassaresu è sempri più prisenti a Sassari cu’ lu triatu, cantzoni, ecc. No ridesci parò a turrà a assé linga di comunicazioni cumpridda. E, a doru mannu, infatti, vidimmu ki fintzamenta i li cuncussi di puisia, li rassegni folk, o la prisintazioni di libri, la linga uffitziari, la ki s’imprea i la prisintazioni o pa ipricà una rasgioni, è sempri l’itarianu. Lu sassaresu, coment’e linga, po fabiddà d’edda in sassaresu? Pensu, antzi, soggu cunvintu, e no vi sardisthia mancu bisognu di dillu, ki emmu. Lu sassaresu à netzessiddai, no tantu, cumenti pari ki sia pa tanti, d’acciappà la paraura antigga i lu fabeddu o l’ischrittu pa dì “eu ni soggu più di te”, ma à bisognu di una mintariddai noba ki digghia: “eu fabeddu lu ki soggu e cun impegnu l’accontzu in camminu”. È una rasgioni justha kistha, akì si si dubaristhia aisità a assé brabi a fabiddallu cumenti li babbi e li giai nosthri, semmu jà suttarrendi la linga nosthra.

A dà un amparu mannu a mantinilla vibà oggi, in una manera sisthimatiga e didattiga i la mitariddai funtumadda, so l’arunni di la primaria IV C di lu II tzirchuru di l’ischora di Santu Giuseppi. Kisthi ischurani so una energia noba ki, cun afficcu, à posthu manu a li competentzi linghisthighi, kissi ki poni abè li ki l’ani imparaddu a ischora, e ani ischrittu Fabedda!

L’ubbiettibu di “Fabedda!”, tandu la redazioni di l’ischurani e di li masthri, è d’iscì da l’appusentu di la crassi e dà nutitzia ki “Noi vi semmu” e, in più, pa dà l’uppurthuniddai a ca lu leggi di cundibidì l’attibiddai didattiga ki si fazi in sassaresu. In kisthu giornari li pitzinni si so un poggu raccuntaddi e daddu althri infuimmazioni puru, assibisthendi lu sassaresu ke un media propiamenti di comunicazioni normari e bonu pa cassisia nutitzia e rasgioni. È una linga d’imparà ancora bè, e eddi n’ani cussentzia, ma, cosa umbè impurthanti, ni so amantiosi e vi credini. Tantu ki la so fendi propia, purthendira, i l’impreu, fintzamenta a casa. A l’ischumentzu mancarri erani un poggu timurosi a ischribì pa un giornari, akì no è cumenti a ‘schora, ma vi l’ani fatta. Ani imparaddu fendi. Ani ischrittu rasgioni ki l’ani tuccaddu di più i l’emutzioni e ki abisumenu ani fattu in althri linghi puru, ma ani pigliaddu fintzamenta incarighi, a ciamadda vuruntaria, a ischribì arthicuri ki so andaddi in primma pagina. E si calchunu a l’ischumentzu à auddu bisognu d’assé incuraggiaddu, althri ani ‘schrittu più di un “petzu”. A la fini s’ani pigliaddu l’andiggu a ischribì e si so dibirthuddi puru. A l’ischumentzu ani ischrittu l’arthicuri i lu cuadernu e, dabboi, tutti umprari, so ‘sthaddi arrasgiunaddi a manera indibiduari e cullettiba cu’ l’aggiuddu di li masthri. Eddi so li ki so fabbidendi a nobu, eddi so la linga sassaresa di dumani, demmuri amparu.

Brabi li pitzinni e brabi li masthri Gabriella Oggiano, Antonella Spanedda, Maria Antonietta Stangoni, Monica Ruiu, Maria Rio, Giovanna Sanna e la direttora Maria Cristina Rebeccu.

A l’althr’innummaru megliu!

CLICCA INOGGHI PA PIGLIA' LU GIORNARI!








 

 
 
 

© 2017 www.sassari.tv - Tutti i diritti riservati - Cookies Policy - Credits