LA PUISIA IN SASSARI, parthi sigunda - Sassari.tv
FABIDEMMU IN SASSARESU
LA PUISIA IN SASSARI, parthi sigunda
Oggi vi vogliu fabiddà di chissi chi si poni ciamà pueti nobi pa’ Sassari.
DI Mario Marras
 
 
 

Oggi vi vogliu fabiddà di chissi chi si poni ciamà pueti nobi pa’ Sassari. Chissi c’abemmu attuppaddu i’ la primma parthi so isthaddi capazi di ischuminzà lu ciambamentu di la puisia nosthra pa’ falla più muderna e dunca si mirescini d’assè sempri ammintaddi.

Oggi v’abemmu ancora unu chi, a 91 anni, ha fattu fa a la puisia sassaresa un brincu impurthanti avveru, acchì ha pruposthu maneri nobi d’ischribì in sassaresu, ammintendizi chi la linga nosthra è assai ricca e no seivi soru a fa gobbuli e a fabiddà di buffunaturi e isthralleri. Si ciamma Aldo Salis, è naddu in Sassari veccia ed era un farmacistha, ha giraddu la prubinzia di Sassari pa’ lu so’ trabagliu e ha sabuddu fa cosi propiu beddi, sia in italianu che in sassaresu. Inogghi lu vurimmu ammintà pa’ “La gianchetta zappuradda” di lu 1979, “Adiu a li fori” di lu 1983, “Un cugnoru di parauri” di lu 2003 e “A manu tenta” di lu 2015. So chisthi li libri chi Aldo ha ischrittu pa’ prisintazzi li so’ obbari di puisia i’ la linga di la so’ ziddai e si vi piazini chisthi cosi, andeddi a zirchalli, chisthi libri, acchì liggendiri abareddi a isthà assai be’: v’è la vidda soia, ma v’è puru Sassari, la famiria, l’amigghi, li logghi, l’anima di la ziddai di pizzinnia ma puru chissa d’abà. E dizi be’ Antonello Bazzu, i’ la prisintazioni di l’ulthimu libru: “…avveru beddi e diricaddi chisthi frutti di lu to’ attugnu!” fabiddendi di li puisii d’Aldo. Chi pudimmu vidè, liggendi li so’ libri, sia cumenti pueta mannu avveru, sia cumenti un ommu di gariddai!

E chi sia pueta di primma impurthanzia lu pudimmu cumprindì ammintendizi chi Aldo ha vintu tanti e tanti Premi di puisia, lu Romangia, lu Premiu Ozieri e dui volthi addirittura lu Premiu “Agniru Canu”, chi pa’ la puisia sassaresa è di siguru lu più famosu e numinaddu. Insomma, l’innommu di Sassari e lu preggiu di la so’ puisia, grazie a eddu, so isthaddi in la bocca di tutti pa’ tantu tempu.

Ma accò casche vessu d’Aldo, pa’ cumprindizzi megliu:

“…tandu no v’era più l’aribari/no v’era giaia cu’ la zappitta in manu/ma un mondu tuttu dibessu e marabigliosu/chi mi frabbiggaba pa’ contu meiu…” (Pizzinnia);

“…muragli antigghi di predda/abìa la me’ ziddai;/muragli nobi d’affrizioni/ha abà lu me’ cori./A chisth’ara, pa’ me,/v’è ischuriggori d’inserru/i’ l’iscaffari di l’anima/undì assentu/passi avviriddi di camini custhrinti;/a inchiddà /v’è la marrania ribelli/di li muntagni contr’a lu zeru,/la sirinadda macca/di li chìgguri in amori,/la giostra allegra di l’eroi/fuggiddi da li libri d’avvinturi…” (Li muragli).

Mi pari chi, puru da pogghi parauri, si po cumprindì cantu sia gran pueta Aldo Salis!

foto tratta da: www.luigiladu.it

 
 
 

© 2017 www.sassari.tv - Tutti i diritti riservati - Cookies Policy - Credits